Woodstock-Festival

S Woodstock Music and Art Festival isch ä Musikfestival gsi, wo as dr musikalisch Höhepunggt vo dr amerikanische Hippiebewegig Flowerpower zelt. Offiziell isch s vom 15. bis zum 17. August 1969 gange, d Zueschauer si aber erscht am Morge druf abzoge.

Uf em Festival si 32 Bands und Solisten ufdräte, wo Folk, Rock, Soul und Bluesmusig gschbiilt hai, und a Gage vo öbbe 200.000 US-Dollar übercho hai. Uf em Festivalgländ hai chaotischi Zueschtänd gherrscht, wil niemer erwartet het, ass sovil Zueschauer chieme. Mä het mit 60.000 Zueschauer grächnet, es si abr meh as 400.000 cho. Meh as ä halbi Million si uf de Wäg noch Woodstock im Vechehr schdeckebliibe und vo dr Bolizei widr heimgschickt worde.

S Festival isch vo Woodstock Ventures veraaschdaltet worde, wo vom junge Musigbroduzänt Michael Lang und zwei New Yorker Undernähmer zu däm Zwäck gründet worden isch. Es isch für d Veraaschdalter zum enä finanzielle Misserfolg worde, will im Gedräng d Heg kapputtgange si und faschd alli ihne hai chönne ohni z zahle.